Ég hata ekki

Sumir segja að ást og hatur séu mjög tengdar tilfinningar og oft breytist ást í hatur.

Það er sennilega margt til í því. Allavega er hatur tilfinning sem er beint að einhverjum aðila. Jafn sterk og ástin getur verið.

Ég væri lygari aldarinnar ef ég segði ekki að undanfarin tvö ár hefði ég ekki borið tilfinningar til þess sem hefur reynst mér verst. Tilfinninga rússíbana einhvernskonar. Á erfitt með að henda reiður á hverskonar tilfinningar það voru, sennilega öll flóran.

Þessi tilfinninga rússíbani spilaði vissulega inní mörg erfið mál á þeim tíma og gerði þau síst betri. Tilfinningar eru líka oft túlkaðar manni í óhag enda geta þær komið manni úr jafnvægi. Látið mann segja hluti sem annars hefðu aldrei verið sagðir og meira á þeim nótunum.

Sumir geta meira að segja notfært sér tilfinningaástand fólks sem á í erfiðum málum og verkefnum.

Svo gerðist það einn daginn - eins og hendi væri veifað.

Ég fann ekki lengur neinar tilfinningar í garð þessa manns. Nada - engar. Hvorki góðar né slæmar.

Alveg sama hvað hann djöflast og gerir á hlut minn og minna - engar tilfinningar. Ekki frekar en ég ber til umferðarmerkjanna, auglýsingaskilta - dáinna hluta.

Tilfinningarnar snúa allar að barninu mínu í þessum kringumstæðum. 

Að sama skapi get ég ekki beint talað um náungakærleik í þessu tilfelli. Samt þykir mér afskaplega vænt um fólk almennt og trúi á þennan kærleik.

En það er þvílíkur léttir að vera komin á þennan stað loksins.  Laus úr þessum rússíbana tilfinninga sem aldrei var boðið formlega að taka þátt í verkefninu.

Léttir.

Sátt.

Samt einkennilegt. Til að mynda ber ég þægilegar náungatilfinningar til barnsföður eldri barnanna minna. Ekki ást - bara virðingu og væntumþykju. Náungakærleik.

En ég hata ekki.

Engann.

 

Athugasemdir

[Ásthildur Cesil Þórðardóttir, 5.8.2011 kl. 20:48]

Gott að vera komin á þann punkt að bera ekki tilfinningar til viðkomandi.  Það gefur þér svigrúm til að gera hlutina með köldu mati á aðstæðum.  Gott hjá þér, gangi þér vel.

[Ásdís Sigurðardóttir, 5.8.2011 kl. 21:09]

Það er nú magnað að á því að hata ekki, hatrið étur mann alltaf upp baráttukveðja

[Sólveig H Sveinbjörnsdóttir, 5.8.2011 kl. 22:20]

Til hamingju með það að vera "laus" við hann :*