Svo sem vér og fyrirgefum vorum skuldunautum.....

Þegar ég var lítil telpa kenndi amma mér faðirvorið. Hún kenndi mér margt fallegt hún amma mín. Bænir, ljóð og sálma.

Fyrir ferminguna var svo þessi viska rifjuð upp og bætt í þennan viskubrunn sem nefnist trú.

Aldrei velti maður fyrir sér raunverulegri merkingu t.d. Faðirvorsins. Átti maður að fyrirgefa þeim sem stóðu í skuld við okkur? Í þá daga voru einu tengsln sem maður sá við skuld - peningar.

Merkilegt að Guð hafi verið að segja okkur að fyrirgefa þeim sem skulduðu okkur peninga.

Það var ekki fyrr en seinna að ég áttaði mig á að hér var átt við syndir eða misgjörðir. Líkt og hann fyrirgefur okkur eigum við að fyrirgefa þeim sem gera á okkar hlut.

Fyrir sumum hljómar þetta kannski einkennilega - jafnvel ómögulega. 

Eigum við að fyrirgefa þeim sem særa okkur? Hafa jafnvel beytt okkur ofbeldi og óréttlæti?

Svarið er einfalt.

Já.

Okkar tilfinningar búa innra með okkur sjálfum. Sársauki og reiði í garð annarra eru ekki þægilegar tilfinningar. En þær skaða engan nema okkur sjálf. Þessar tilfinningar skaða ekki þann sem þeim er beint að. Oftast eru þær persónur ómeðvitaðar um okkar tilfinningar, eða slétt sama.

Við þurfum ekki að vera sámmála því sem aðrir hafa gert á okkar hlut. Við þurfum ekki að samþykkja það sem réttan eða góðan gjörning.

En með því að finna það með okkur að fyrirgefa, þá losnum við okkur frá þessum oft óbærilegu tilfinningum.

Þær eru ekki þess virði að dröslast með þær, bara til að skaprauna sjálfum okkur.

Leiðin getur stundum verið löng. Það getur verið erfitt að fyrirgefa.

En það er hægt.

Og þar með sleppum við tökum á því sem hefur valdið okkur hugarangri. 

Og okkur fer að líða vel.

Reynsluna setjum við síðan í reynslubankann sem sumir kalla lífið.

Reynum að nota hana til góðs og aukins þroska.

Það má meira að segja seinna nota reynsluna í óþrjótandi sögur.

Sögur um lífið og tilveruna.

Athugasemdir

[Ásthildur Cesil Þórðardóttir, 31.5.2011 kl. 12:24]

Vel mælt, og svo satt. Við verðum að læra að fyrirgefa þeim sem gera á okkar hlut.  Jákvæð kærleiksrík hugsun skilar okkur svo miklu miklu meira.

[Skúmaskot tilverunnar, 31.5.2011 kl. 15:45]

Það er alveg satt :) Hversu erfitt sem það getur stundum reynst þá er það eina leiðin að innri ró.