Afhverju þegir fólk?

Allir vita að ofbeldi í hvaða mynd sem það er - er ekki liðið.

Í barnalögum kemur þetta t.d. skýrt fram.

Enginn skilur afhverju fólk þegir þunnu hljóði þegar einhversskonar ofbeldi á sér stað innan fjölskyldu. Svo uppveðrast allir ef greint er frá slíku samanber fréttir í DV nú uppá síðkastið.

Hvernig gat þetta átt sér stað?

Afhverju sagði enginn neitt?

Afhverju gerði enginn neitt?

Það eru margar ástæður þess að heimilisofbeldi - í hvaða mynd sem það nú er - er eitt best geymda leyndarmálið.

Er fórnarlambinu trúað? Sem oftast er orðið niðurbrotið á sál og líkama.

Stundum, þá helst af þeim sem þekkja það mjög vel - ásamt geranda. Aðrir tvístíga. Viðkomandi finnst það kannski orðið svolítið tæpt - svokallað fórnarlamb. Skrítið - hver er ekki tæpur eftir jafnvel margra ára kúgun?

Heldur fólk að t.d. Kvennaathvarfið sé heimsótt af konum sem skína af gleði og sjálfstrausti?

Svo er annað. Er einhver til í að standa með þeim?

Oftast er þetta svo viðkvæmt mál að flestir vilja ekki láta bendla sig við það. Eru jafnvel smeikir við gerandann, ef þeir á annað borð trúa fórnarlambinu.

Langoftast er fórnarlambið talið ruglað - hlýtur bara eitthvað að vera að hjá þessari/þessum. 

Þetta er síðan styrkt af dómskerfinu. 

Í dómskerfinu er mikilvægt að viðkomandi skíni af sjálfsöryggi og heilbrigði. Það er trúðverðugt.

 

Og alltaf finnst fólki jafn skrýtið að heimilisofbeldi sé svona mikið leyndarmál.

Afhverju skyldi það vera þannig?

Athugasemdir

[Ásthildur Cesil Þórðardóttir, 31.8.2011 kl. 19:39]

Já af hverju þegjum við  góð spurning.  Dóttir mín var um það bil fjórtán ára, þegar hún sagði mér að vinkona hennar sætti kynferðislegu ofbeldi af hendi föður síns.  Hún fór til Félagsmálastjóra, hann stakk þessu undir stól, en fór samt að garfa eitthvað í þessu, sem varð svo til þess að faðirinn flutti með fjölskylduna til annars sveitarfélags.  Þar gat hann haldið áfram óáreittur. 

Ég hefði örugglega átt að láta til mín taka.  En það er alltaf þetta en, við verðum að hætta að hugsa svoleiðis og taka af skarið.  Ég held að ég myndi gera það í dag.

[Skúmaskot tilverunnar, 2.9.2011 kl. 16:48]

Það er ég viss um. Mundi gera það sama. Samt spurning hvort það væri nóg eins og kerfið er í dag. Það virðist sérhannað fyrir ofbeldismenn og fjárglæframenn. Einungis fíkniefnamál virðast ná einhverju striki. Ásamt smáhnupplurum.

Það er "hættulegra" að ræna epli í Bónus en að viðhafa ofbeldi.